Wenn Fasnacht isch, denn isch in Chur nit dr Bär los, sondern dr Bock. Und dä het Bock. Kürzlich het a Zuafall bewiesa, dass dr Khurer Bock schu sit mindestens 100 Johr Bock het uf Fasnacht. Und mit ihm d’Churerinna und Churer. Usser villicht dr Jürg J., dä eher nit so. D’Plaketta 2027 stoht drum […]
Weiterlesen →
Churer Fasnacht
Mittwoch, 11. November 2026 · 17:02
D’Fasnächtlerinna und Fasnächtler treffend sich in dr Khurer Rothushalla, wo dr Stapi – aktuell dr Meuli Hans Martin – dr Schlüssel zur Stadt an dr Präsident vur Fasnachtsvereinigung übergit. Ab jetzt ghört d’Bündner Hauptstadt da Narra. As froit üs, dass d’Schlüsselübergaab dasjohr vu Guggamusika begleitet wird. Wichtig: miar starten nüm am 11:11 sondern am 16:45 mit Höhepunkt am 17:11.
Freitag, 5. Februar 2027 · 17:02
Jetzt isch würkli Fasnacht. Zum Uuftakt trifft sich d’Fasnachtsgmeind ab 2027 nüm zur Uufwärmata sondern zum Khurer Knall ufem Martinsplatz. An noia Event, wo dia alti Tradition vum Iischüscha durch d’Cannoniers de Carneval ufleba loht und mitra einzigartiga Komponenta ergänzt. Luut, bunt, Fasnacht total. Das wird brutal guat, seit dr Patric.
Uuswärtigi Guggana sind imfall mega willkomma – will, je me desto besser! Am besta grad unna mitem Formular amelda.
Samstag, 6. Februar 2027 · 17:02
Dr gross Umzug isch siit über 50 Johr Zentrum und Herzstuck vur Fasnachtsziit in dr Bündner Hauptstadt. Jenschti Gugga und Kliggana verwandlend Khur in a Bühni und machend das mehrstündiga Spektakel zuma richtiga Volksfescht.
Und denn gohts ab uf d’Gass! In dr historischa Altstadt treffend sich Narra, Kostümiarti und Guggamusika zur legendära Strossafasnacht. Guggana vu do und au vu swo anderscht fiirend mit irem Sound dia 5. Johresziit – als freii Formationa odr uf da Bühna in dr Altstadt*. Und dia dekoriarta Bars sorgend für Abwechslig und mengmol auf biz Wärmi – will z’Trinka gebt’s dussa au. Bis tüüf in d’Nacht jedafalls khört denn d’Khurer Altstadt da Narra.
*Gern nehmemer oi ins freiwilliga Programm, wenn er oi unna ameldend.
(Freiwillig heisst denn nit, miar luagend mol ob mer kömmend. A fixa Termin ischs denn schu.)
Sonntag, 7. Februar 2027 · 17:02
Nochdem dia «Grossa» ira Spass kha hend, töffend au dia Kliinschta no mitfeschta. Öppa Zwai-Tuusig Kids und Teenies begeisterend am Kinderumzug d’Zuaschauerinna und Zuaschauer. Mit viel Froid, Charme und Fantasie sorgend dia klina Fasnächtlerinna und Fasnächtler für a einzigartigi Stimmig und machend dr Kinderumzug zuma bsundera Highlight.
Miar froiend üs über jedi Gugga, wo zemma mit üsna klina Fasnächtler laufa will – au wenns schu gross sind.
Montag, 8. Februar 2027 · 17:02
Am Mäntig nehmemer denn kai Blatt meh vors Muul – macht dr Bündner jo eh nit. Aber d’Schnitzelbänk vu da regionala Maischterformationa sind denn schu nomol a anderi Kategorie. Jedafalls wird in da Beiza gsunga, graimt und charmant uustailt. So guat, dass mer es mittlerwiila schu am Friitigobed a erschti Rundi Schnitzelbänk git.
Dienstag, 9. Februar 2027 · 17:02
Am Fasnachts-Ziischtig git’s au kurz vor Schluss kai halbi Sacha: Am letschta Obed vur Fasnacht werden nomol d’Khurer Gassa übernoh. Guggana, Fasnächtler und Beizer schiabend a närrischi Extraschicht bis zum bittera End am Mittwuchmorga. Es wird nomol gsunda, tanzt und gfeschtet.
Dienstag, 9. Februar 2027 · 17:02
Das isch jetzt noi. Miar treffend üs am 8i (20:00 Uhr) bir GKB/Restaurant Calanda und marschiarend denn zemma uffa zum Arcas-Platz, em Fasnachtszentrum. Natürli mit Zwüschastopp in dr Rothuushalla. Mit dabi sind Guggana, Kligga mit (belüchteta) Handwaga und as paar Gäscht.
Mittwoch, 10. Februar 2027 · 17:02
Dr farbigi Abschluss vur 5. Johresziit isch denn, wenn sich dr harti Kern am Mittwuchmorga uf da Strossa mit dena vermischt, wo gad go schaffa gönd. Traditionell beendet a handvoll hartgsottni Fasnächtlerinna und Fasnächtler zemma mit em Vorstand vur Fasnachtsvereinigung dia Närrischi Ziit mitama kliina Umzug zrugg zur Rothushalla. Dött kriagt dr Stapi sin Schlüssel zrugg und miar gönd hai und ruabend üs us für nögscht Johr.
2027
D’Plaketta vur Churer Fasnachtsvereinigung isch nit aifach nur das Souvenir schlechthin. As isch in erschter Linia quasi dr Iitritt an da Umzug, diin munzig-kliina biitrag dafür, dass der 7 Täg lang d’Ohra wacklend.
Wenn Fasnacht isch, denn isch in Chur nit dr Bär los, sondern dr Bock. Und dä het Bock. Kürzlich het a Zuafall bewiesa, dass dr Khurer Bock schu sit mindestens 100 Johr Bock het uf Fasnacht. Und mit ihm d’Churerinna und Churer. Usser villicht dr Jürg J., dä eher nit so.
D’Plaketta 2027 stoht drum genau für dia johrhunderti alti Tradition. Aber gliichziitig au für an Noi-Afang unter em noia Vorstand. As isch z’Sujet vum noia Logo vur Fasnachtsvereinigung Chur: dr Khurer Bock usem Stadtwappa, im wilda Fasnachtsfiaber und völlig usem Hüüsli. No knapp im Zaum halta kann dä nuno an Obernarr, aina vum Voorstand wenn ma so will.
Das isch nit öppa as erfundenes Sujet mitanra erfundana Gschicht. Wia xait sind miar vor Kurzem über dr Bewiis für d’Churer Fasnachtstradition gstolperet: Z’Plakat für da Fasnachtsumzug vu 1925 zeigt nämli exakt das Sujet: an Narr riitet ufema Staibock. Miar töffend also davo usgoh, dass dr Khurer Bock au no früaner schu, zu Jenatschs Ziita, Bock uf Fasnacht kha het.
Zoga het dia Schlussfolgerig dr Alex Tobisch, Mitgliid vum noia Voorstand vur Fasnachtsvereinigung Chur. «Miar het dä Gedanka gfalla, dass das dr Bock usem Churer Stadtwappa isch wo aifach komplett duradreht will er so Fän isch vur Fasnacht», seit dä. D’Gschicht dazua seg schnell erfunda gsi und drusussa seg denn d’Idee fürs noia Logo entstanda.
«Altbewährt und Neugewagt» könnti also nit nur z’inoffiziella Motto vum noia Voorstand si, sondern zaigt sich au im Logo als Verbindig vu Tradition und Moderni. Dä Gedanka, das Ziel prägend miar als bliibends Zaicha in d’Fasnachtsplaketta 2027.
Wia miar zuakünftig d’Plaketta gstaltend, also wer, wia wo und was – das müamer no ussafinda. Erschtmol isch jetzt wichtig, dass dia Plaketta unter d’Lüüt kunnt. Falls das im Lauf vu da Johrhunderta vergessa ganga si sött: D’Plaketta vur Churer Fasnachtsvereinigung isch nit aifach nur das Souvenir schlechthin. As isch in erschter Linia quasi dr Iitritt an da Umzug, diin munzig-kliina Biitrag dafür, dass dr 7 Täg lang d’Ohra wacklend. Heisst im Klartext: Ohni Plaketta kai Umzug, kai Guggabühna, kai Festwirtschaft, kai Zelt, kurz gsait KAI SPASS. Dia paar Rappa sind ehrasach. Danka schu jetzt.
Die Churer Fasnacht lebt von Menschen, die sie tragen, organisieren und jedes Jahr neu mit Leben füllen - uns allen. Hier erfährst du mehr über unseren Verband, die Geschichte der Churer Fasnacht und über unseren Auftritt.
IBAN
CH20 0077 4010 3470 1910 0
Graubündner Kantonalbank
